好來好去

我成日就話，好來好去就好。無謂搞cheap 自己。

其實條友係唔係真係唔知自己好乞人憎？

避開你九千幾次，連blog都搬埋，仲好意思經google + add 我入交友圈？

由我個blog開始, facebook, linkedin, google+... 你知唔知你真係好騷擾？

又或者你係咪覺得我欠你乜野？

又或者你係咁響不同渠道嘗試接觸我，為左咩事？

有冇覺得自己好煩？

01年分手，到而家都仲係咁，你係咪好得閒？

如果你真係覺得你最大成就係 be found by honey， 咁我唔該你放過我啦，好冇？

我冇興趣知道你同你D honey 點樣相處呀，更冇興趣知道個honey 係男定係女，定係真人定係又係你自己幻想出來o個o的o野呀。

幫個手唔好再煩我喇好冇？

大後備

好奇怪，每次要搵人代帶祈禱，幾乎一定係搵我。
今日老細直情叫我做「最佳義工」。

我今日出糧喎……

極其量，其實我只係「最佳後備」o者。

算啦，慣架喇。

太遲

有時老友約食飯，唔係話唔俾面。

星期五呢類日子，人地一早約到實晒。
你失驚無神今晚話後晚得唔得，
唔係我唔想黎，人地兩星期之前已經舖晒event，
俾我感覺係你老婆突然間話唔得閒，
求其搵幾個friend 食餐咁囉。

冇乜誠意。

雖則話我一條單身寡仔，
其實我都有唔少朋友，
星期五六晚要出街聚、食飯，
唔係話排到密密麻麻，一個月兩三次有咩出奇？

一個月得四五個星期五o架咋。

最正都仲係，三張幾野，同我講叫我出黎食飯，
「不過唔好叫阿乜水乜水」。
我又唔係八婆，你約我，我做乜叫埋第二個？
我識睇人眉頭眼額的，明知你同乜水唔妥，我叫佢來，
背脊骨落麼。

那些年坐過的熱狗

好耐冇過過追巴士的生活。星期六跟中學同學去坐熱狗。

 除了覺得近來的巴迷太誇張、九記同我唔夾、我好憎九記之外，
 就係覺得自己老了。

 坐215X去到X田村，見到那堆診所，
 又再想起我的那些年。
 十幾年喇，真係好可怕。

 我仲記得，當年每次送完佢返屋企，
 一個人坐熱狗返落觀塘地鐵站時， o個種沉重的心情。

 諗來做咩丫，人地仔都生埋，四五歲都有喇。仲想點丫。

 不過話說回來，見到走晒樣的人妻，
 而自己除o左肥多少之外，一切依舊，
 真係唔知應該開心定唔開心。

跑數大撚晒呀？

我都跑數喎，縮班呀，係咪綁架D小朋友去我間學校度註冊？

呢間十九銀行的十九戶口，我遲早取消埋佢。

卒之解開一個謎

整理舊網頁書簽時，逐個click。有好多朋友的xanga 已停用，順道delete。

去到某個已經唔係朋友的人的專屬網站，發覺俾人騎劫了。一片黑色網頁，寫住「墳墓出奇地是個好地方」，下面一句句似是而非的日文，全部都係廣告。

難怪一打佢個名，就出「死」同「死因」咁大件事。

認真唔老泥。不過都係呢句，佢死唔死，其實與已無關。

翻牆？

我全部用中文打的blog，竟然有俄羅斯ip 來睇。

你話唔係有人翻牆，我真係唔係幾信。

領會

昨晚兩單跟領匯有關的新聞。

一單是觀塘某屋村報紙檔因為加租而結業。
另一單是領匯宣佈終止「尋你老味」活動。

領匯或許算是個「第三sector」，但我更覺得它似日本郵政。私營化後，得到私營機橋之名，卻承受著公營機構的社會期望。

本來一間上市公司，為股東利益著想天經地義。我想作為一個商場地主，它的公共性雖大，但大不過各個有利潤監管的公營事業如煤氣電燈，起碼，我唔去領匯商場間百佳，我仲可以行落兩個街口，幫趁乜水間士多。

雖然間士多又貴又污糟。起碼，我有得揀。

話說西九某屋苑的500呎單位，過去一年平均都加了1500蚊租，一個商舖，加4000，你真係覺得維唔住皮到要執笠咁大件事？
你會因為你老闆冇加你人工，業主加你1500蚊，叫你補返牆身兩個窿（你裝書架上牆時整的），而決定返老豆老母屋企迫迫地同老婆住返一間50呎o既房最多俾多些少家用老豆老母嗎？

你肯，我諗你老婆都未必制。

我唔熟商業運作，但上市公司，賺錢，為自己（股東）求取最大利潤，有咩唔妥？
個問題係，你有得揀喎，租第度？改做上門派報？搬？點解情願放兩張凳同人吹水都唔放水櫃？懶？

社會在變，傳統行業，唔想變，搬都唔想搬，邊個o既錯？

有冇人話許留山、奇華忘本？
香港仔謝記唔係租領匯場，佢地都唔做喎，係咪要去謝記門口抗議，要求佢地保留香港仔特式產業，還我集體回憶？

咦？咁點解你落七仔ok買報紙，去百佳買罐頭？

我只係覺得如果大家好切實咁履行自己o既信念，佢地點會交唔起租？阿信屋就係一個例子，大家一呼百應支持佢對抗財閥。

當然，結果就係佢成為後起之秀，急速擴張，「意外地」打殘其他苟延殘喘的非連鎖式食品舖。早兩日報紙都有賣。

結果個個都做晒紙海鬥士鍵盤戰線，有人改圖有人抽水，最後，邊個做過最實際o既事，去幫趁？日日行去買份報紙睇？

空姐的行李篋: 關於《盛女愛作戰》

空姐的行李篋: 關於《盛女愛作戰》

我還沒有看過這節目，恕我自命藍血也好，孤芳自賞都好，有得揀的話，敝家電視的選台先後次序分別是now 100, now 101, now 新聞，有線新聞，才到無線電視（台號19的拾玖台不在敝家節目選擇當中）。

看朋友在FB的評論，大抵是毀多於譽，造馬扮野之聲此起彼落。跟住越鬧越改圖，大家越去睇。就一個商營機構來說，已賺得眼球了，功德圓滿。

只是正如空姐的行李篋所言那位極品一樣，或許是個警世鐘也不定。

當然，女多男少，男不一定有優勢。正如女的看男的不順眼情願單身一樣，也有大量宅男把自己遺留在二次元的Love Game 世界，拒絕接受三次元的港女。

我不會叫港女們反省，這未必是他們的問題。但同樣道理，宅男也應該不被譴責。

每個人為自己的抉擇負責任。最少我這樣認為。

這天的將軍澳道已經沒有那麼長

今日終於駕車經過將軍澳道。
我沒有往左望那已封閉的堆填區；
也沒有往右望那棟有回憶的公屋。
因為我知道，我要專心駕駛。
車內的音響在播盧冠廷的「一生所愛」，其實只是巧合，我也沒有特意的去想去聽。
卻發覺這條路，比我想像的短。

駛過了將軍澳隧道，那3元的隧道費，彷如隔世的感覺。

到了回程，車上多了別人的老婆和女兒，更不容我胡思亂想。
我不敢奢望，下一次經過將軍澳道時，車內的是自己的老婆仔女，
只是，我希望每次經過這條路，我都能以輕鬆愉快的心情走過。

Sherry, 祝妳平安。
p.s. 我想我放得下了。

整定

完成了那本中巴ibook，卻不想放在iTunes store，因為太煩。
好在ibooks author 有輸出pdf 的選項。
最後卻因為忘了自己網站的密碼，繼續企響度。

整定

第一本ibook

既然用mac，也有用ipad，當然有download ibooks author。

本來有想寫的東西，但發覺乏善可陳，要不就是要寫的東西出不了街。

那算了吧，整本巴士書，如何？

假期

這種感覺久遺了。好像離我很遠。

睡到11點才醒的感覺真好。